ຂ່າວສານ

ທ່ານຫົວໜ້າ ກົມລ້ຽງສັດ ແລະ ການປະມົງ ພ້ອມດ້ວຍຄະນະ ລົງຕິດຕາມກວດກາຄວາມພ້ອມ ໃນການສີດພົ່ນຢາຂ້າເຊື້ອພາຫະນະ

ໃນໄລຍະປີ 2004 ຫາ ປີ 2015 ຜ່ານມາ ໄດ້ມີການສີດພົ່ນຢາຂ້າເຊື້ອພາຫະນະ ທີ່ເຂົ້າຜ່ານດ່ານສາກົນຂົວມິດຕະ ພາບ ລາວ-ໄທ 1 ເປັນປົກກະຕິ ເຊີ່ງສາມາດຫຼຸດຜ່ອນຄວາມສ່ຽງຕໍ່ການແຜ່ລະບາດຂອງພະຍາດ ທີ່ອາດປົນເປື້ອນ ຕິດມານໍາຍານພາ​ຫະ​ນະ ແລະ ວັດຖຸຫຸ້ມຫໍ່ ທີ່ທຳການຂົນສົ່ງເຂົ້າມານັ້ນ ໄດ້ຫຼາຍກວ່າ 60% ຕາມການສຶກສາ ແລະ ໄດ້ຮັບການຢັ້ງຢືນຈາກຫຼາຍປະເທດໃນໂລກ. ພາຍຫຼັງໄດ້ຮັບຄຳ​ສັ່ງ​ຂອງ​ລັດ​ຖະ​ມົນ​ຕີ​ ກະ​​ຊວງ​ກະ​ສິກຳ ແລະ ປ່າ​ໄມ້ ​ສະ​ບັບ​ເລກ​ທີ 3773/ກ​ປ ລົງ​ວັນ​ທີ 14 ທັນ​ວາ 2016 ກ່ຽວ​ກັບ​ການຢຸດຕິ​ຊົ່ວ​ຄາວ ການ​ສີດ​ພົ່ນ​ຢາ​ຂ້າ​ເຊື້ອ​ພາ​ຫະ​ນະ​ທົ່ວ​ໄປ ທີ່​ເຂົ້າ​ມາ ສ​ ປ ​ປ ລາວ ຫຼັງຈາກນັ້ນ ໃນທ້າຍປີ 2016 ກໍ່ຢຸດເຊົາສີດພົ່ນຢາຂ້າເຊື້ອພາຫະນະ. ແຕ່ຊ່ວງໄລຍະການຢຸດເຊົ່າສີດພົ່ນຢາຂ້າເຊື້ອພາຫະນະ ມາຮອດປັດຈຸບັນ ອີງຕາມການເກັບກຳຂໍ້ມູນລາຍງານ ຈາກອົງການສຸຂະພາບສັດສາກົນ (OIE) ຍັງມີການລະບາດພະຍາດສັດ ປະຈໍາລະດູການເຊັ່ນ: ພະຍາດໄຂ້ຫວັດສັດປີກ(H5N1, H5N6, H5N8), ພະຍາດໄຂ້ຫວັດໃຫຍ່ (H7N9), ພະຍາດຫູກໍ່າໝູ (PRRS), ພະຍາດປາກເປື່ອຍລົງເລັບ (FMD), ພະຍາດເຕົ້າໂຮມເລືອດ (HS) ແລະ ພະຍາດ ອື່ນໆ. ໃນນີ້, ຕົ້ນປີ 2019 ຜ່ານມາ ມີການເກີດລະບາດພະຍາດອາຫິວາໝູອາຟຣິກາ (ASF African Swine Fever) ຢູ່ ສປປ ລາວ ລວມມີ 18 ແຂວງ ໃນນີ້ ນະຄອນ ຫຼວງວຽງຈັນ ມີ 04 ເມືອງ ທີ່ໄດ້ຮັບຜົນກະທົບ ແລະ ໃນປັດຈຸບັນ ກໍ່ມີສະພາບການລະບາດ ຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ໃນຫຼາຍປະເທດ ໄດ້ຂະຫຍາຍເປັນວົງກວ້າງ, ສືບຕໍ່ມີກໍລະນີຜູ້ຕິດເຊື້ອ ແລະ ເພີ້ມຂື້ນແຕ່ລະວັນ, ອົງການອະນາໄມໂລກ ໄດ້ປະເມີນວ່າ (COVID-19) ແມ່ນມີຄວາມສ່ຽງສູງ ແລະ ປະກາດເປັນການລະບາດ ໃຫຍ່ທົ່ວໂລກ. ໃນວັນທີ 24 ມີນາ 2020 ນະຄອນຫຼວງວຽງຈັນ ກໍ່ໄດ້ພົບມີກໍລະນີຜູ້ຕິດເຊື້ອ (COVID -19). ອີກດ້ານໜຶ່ງຢູ່ບັນດາປະເທດອ້ອມຂ້າງ, ໃນພາກພື້ນອາຊຽນ ແລະ ສາກົນຍັງມີກໍລະນີຜູ້ຕິດເຊື້ອເພີ້ມຂື້ນ ໃນແຕ່ລະວັນ. ຕໍ່ກັບສະພາບການດັ່ງກ່າວ ນະ​ຄອນຫຼວງວຽງ​ຈັນ ຍັງຖືວ່າ​ໄດ້​ຮັບ​ໄພຂົ່ມຂູ່ຈາກການລະບາດພະຍາດ ທີມີຜົນກະທົບຕໍ່ດ້ານເສດຖະກິດ ແລະ ການດຳລົງຊີວິດຂອງພໍ່-ແມ່ປະຊາຊົນລາວບັນດາເຜົ່າ.

ໃນວຽກງານດັ່ງກ່າວນີ້ ມີຄວາມຈຳເປັນ ຕ້ອງ​ໄດ້ເຂັ້ມ​ງວດກວດກາ ເອົາໃຈໃສ່ຕິດຕາມເຝົ້າລະວັງ ແລະ ວາງແຜນການຄວບ​ຄຸມພະຍາດ​ ກໍ່ຄືການຈັດຕັ້ງປະຕິບັດມາດຕະການສີດພົ່ນຢາຂ້າເຊື້ອໃສ່ພາ​ຫະ​ນະ ເພື່ອຫຼຸດຜ່ອນຄວາມສ່ຽງຕໍ່ການແຜ່ລະບາດພະຍາດ ທີ່ອາດປົນເປື້ອນ ຕິດຕາມມານໍາພາຫານະ ແລະ ວັດຖຸຫຸ້ມຫໍ່ ທີ່ທຳການຂົນສົ່ງເຂົ້າມານັ້ນ ແລະ ມາດຕະການດັ່ງກ່າວນີ້ ກໍ່ໄດ້ປະຕິບັດຢູ່ຫຼາຍປະເທດໃນໂລກ.