ຂ່າວສານ

ດ່ານກວດກາສັດຕະວະແພດສາກົນເຂົ້າຮ່ວມກອງປະຊຸມ ລາວ-ໄທ ທີ່ ​ໂຮງ​ແຮມ​ວັນ​ຊະນະຣີ​ເວີ​ຊາຍ​ດ໌ ນະຄອນຫຼວງວຽງຈັນ

ກອງປະຊຸມຄະນະ​ກໍາມາ​ທິການພັດທະນາການລ້ຽງສັດ ສອງຝ່າຍ ລາວ-ໄທ ຄັ້ງທີ 16 ແລະ ກອງປະຊຸມຄະນະກຳມາທິການ ​ດ່ານ​ກັກ​ກັນ​ສັດ​ ລາວ-​ໄທ ຄັ້ງທີ 9, ຈັດຂື້ນໃນລະຫວ່າງວັນ​ທີ 16-17 ກັນຍາ 2019 ທີ່​ໂຮງ​ແຮມ​ວັນ​ຊະນະຣີ​ເວີ​ຊາຍ​ດ໌, ນະຄອນຫຼວງ​ວຽງ​ຈັນ, ສປປ ລາວ ໃຫ້ກຽດກ່າວຕ້ອນຮັບໂດຍ ທ່ານ ດຣ ບຸນຂວາງ ຄຳບຸນເຮືອງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ແລະ ກ່າວເປີດກອງປະຊຸມໂດຍ ທ່ານນາງ ວິໄລພອນ ວໍລະພິມ ຫົວໜ້າກົມລ້ຽງສັດ ແລະ ການປະມົງ.

ຄະນະຜູ້ແທນຝ່າຍລາວ ນໍາໂດຍ ທ່ານ ດຣ ສີທອງ ພິພັກຂະວົງ ຮອງຫົວໜ້າກົມລ້ຽງສັດ ແລະ ການປະມົງ ພ້ອມມີຜູ້ເຂົ້າຮ່ວມຈາກ ພະແນກສັດຕະວະແພດ, ພະແນກລະບຽບການ-ສຸຂະນາໄມ, ພະແນກຄຸ້ມຄອງການລ້ຽງສັດ, ພະແນກແຜນການ, ສູນວິໄຈພະຍາດສັດ, ຂະແໜງລ້ຽງສັດ-ການປະມົງ ແລະ ດ່ານກວດກາສັດຕະວະແພດສາກົນ ແຂວງ/ນະຄອນຫຼວງວຽງຈັນ ຄູ່ຂະໜານ: ແຂວງ ບໍລິຄຳໄຊ, ບໍ່ແກ້ວ, ຄຳມ່ວນ, ສະຫວັນນະເຂດ, ຈຳປາສັກ, ໄຊຍະບູລີ ແລະ ນະຄອນຫຼວງວຽງຈັນ ລວມທັງໝົດ 31 ທ່ານ ຍິງ 13 ທ່ານ.

ຄະນະຜູ້ແທນຝ່າຍໄທ ນໍາໂດຍ ທ່ານ ດຣ ຈິຣະສັກ ພິພັດພົງໂສພົນ ຮອງອະທິບໍດີ ກົມປະສຸສັດ ກະຊວງກະເສດ ແລະ ສະຫະກອນ ຣາຊະອານາຈັກໄທ ພ້ອມມີຜູ້ເຂົ້າຮ່ວມຈາກ ສຳນັກງານສົ່ງການລ້ຽງສັດ, ສຳນັກງານຄວບຄຸມພະຍາດສັດ ແລະ ດ່ານກັກກັນສັດລະຫວ່າງປະເທດ ຄູ່ຂະໜານ ລວມທັງໝົດ 14 ທ່ານ ຍິງ 04 ທ່ານ.

ຈຸດປະສົງການຈັດປະຊຸມ ເພື່ອ​ທົບ​ທວນ​ຄືນ​ຜົນ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ ການ​ຮ່ວມ​ມື ດ້ານ​ການ​ລ້ຽງ​ສັດ, ການ​ກັກ​ກັນ​ສັດ ແລະ ການ​ຄວບ​ຄຸມ​ພະ​ຍາດ​ສັດ​ຕາມ​ຊາຍ​ແດນ ໃນໄລຍະປີທີ່ຜ່ານມາ ແລະ ການວາງແຜນຮ່ວມມືກັນ ໃນການຈັດຕັ້ງປະຕິບັດວຽກງານ ໃນຕໍ່ໜ້າ