ຂ່າວສານ

ກອງປະຊຸມໃຫຍ່ສະມາຊິກ ຄັ້ງທີ IV ຂອງໜ່ວຍພັກ ຂະແໜງລ້ຽງສັດ ແລະ ການປະມົງນະຄອນຫຼວງວຽງຈັນ

          ກອງປະຊຸມໃຫຍ່ສະມາຊິກພັກ ຄັ້ງທີ IV ຂອງໜ່ວຍພັກຂະແໜງລ້ຽງສັດ ແລະ ການປະມົງ ໄດ້ໄຂຂື້ນໃນວັນທີ 06 ສິງຫາ 2019  ທີ່ຫ້ອງປະຊຸມໃຫຍ່ພະແນກ ກະສິກຳ ແລະ ປ່າໄມ້ ປະຈຳ ນະຄອນຫຼວງວຽງຈັນ ເປັນເວລາ 1 ຕອນ ມີຜູ້ແທນສົມບູນເຂົ້າຮ່ວມ 20 ສະຫາຍ ຍິງ 04​ ສະຫາຍ.

          ກອງປະຊຸມໄດ້ຮັບກຽດເປັນປະທານໂດຍ ສະຫາຍ ປອ ຫຼ້າສາຍ ນວນທາສິງ ຄະນະພັກ ນະຄອນຫຼວງວຽງຈັນ, ເລຂາ ຄະນະພັກຮາກຖານ ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ, ຫົວໜ້າພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ, ຜ່ານການດຳເນີນກອງປະຊຸມອັນເຕັມໄປດ້ວຍເນື້ອໃນ ມີບັນຍາກາດອັນສົດຊື່ນແຈ່ມໃສ ແລະ ມີຄວາມເປັນເອກະພາບ. ສາມາດຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ຖອດຖອນບົດຮຽນການຊີ້ນນຳ-ນຳພາ ຂອງຄະນະໜ່ວຍພັກໃນໄລຍະຜ່ານມາ.

          ບົນພື້ນຖານຄວາມຮັບຮູ້ຕໍ່ຜົນສຳເລັດທີ່ຍາດມາໄດ້ ແລະ ຕີລາຄາຢ່າງພາວະວິໄສ ກອງປະຊຸມໄດ້ຕົກລົງຮັບຮອງເອົາເນື້ອໃນຕົ້ນຕໍ ດັ່ງນີ້:

1. ກອງປະຊຸມໄດ້ຮັບຮອງເອົາບົດລາຍງານການເມືອງ ທັງ 2 ພາກ ທີ່ໄດ້ສັງເກດຕີລາຄາການຊີ້ນຳ-ນຳພາ ແລະ ຜົນງານທີ່ຍາດມາໄດ້ທາງດ້ານດີທີ່ຄວນສົ່ງເສີມ ແລະ ດ້ານອ່ອນຂໍ້ຄົງຄ້າງທີ່ໜ່ວຍພັກ ສະມາຊິກພັກເຮົາຈະໄດ້ສືບຕໍ່ປັບປຸງແກ້ໄຂໃນຕໍ່ໜ້າ.

2. ຜູ້ແທນກອງປະຊຸມໃຫຍ່ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ບົນພື້ນຖານຄວາມຖືກຕ້ອງ ແລະ ສອດຄ່ອງກັບມາດຖານເງື່ອນໄຂທີ່ກອງປະຊຸມໄດ້ກຳນົດໄວ້ ເຊິ່ງມີຜູ້ລົງສະໝັກເລືອກຕັ້ງທັງໝົດ 05 ສພຫາຍ, ຍິງ 01 ສະຫາຍ ຄື:

1) ສະຫາຍ ດ່າຍ ສີຫາລາດ

2) ສະຫາຍ ແສງເພັດ ຈັນທະເສນ

3) ສະຫາຍ ນາງ ບົວພັນ ຈັນທະສິດ

4) ສະຫາຍ ດົວລີ ລີເລ່ຍນູ່

5) ສະຫາຍ ດາວທຽມ ຈັນທະລັງສີ

ກອງປະຊຸມຄັ້ງປະຖົມມະລຶກຂອງຄະນະໜ່ວຍພັກ ຂະແໜງລ້ຽງສັດ ແລະ ການປະມົງ ໄດ້ເປັນເອກະສັນເລືອກຕັ້ງເອົາເລຂາໜ່ວຍພັກ, ຮອງເລຂາໜ່ວຍພັກ ແລະ ປະທານກວດກາໜ່ວຍພັກ ດັ່ງນີ້:

1) ສະຫາຍ      ດ່າຍ ສີຫາລາດ             ເປັນເລຂາໜ່ວຍພັກ;

2) ສະຫາຍ      ແສງເພັດ ຈັນທະເສນ                ເປັນຮອງເລຂາໜ່ວຍພັກ;

3) ສະຫາຍ      ດົວລີ ລີເລ່ຍນູ                        ເປັນປະທານກວດກາໜ່ວຍພັກ;

4) ສະຫາຍ      ດາວທຽມ ຈັນທະລັງສີ              ເປັນຮອງປະທານກວດກາ.

5) ສະຫາຍ      ພຸດສາຄອນ ອິນໂຍທາ               ເປັນຜູ້ຊ່ວຍວຽກກວດກາ;

6) ສະຫາຍ      ທອງໄຫຼ ວົງປະເສີດ                  ເປັນຜູ້ຊ່ວຍວຽກກວດກາ.

ການປ່ອນບັດເລືອກເອົາຄະນະໜ່ວຍພັກ ແມ່ນໄດ້ດຳເນີນຢ່າງມີບັນຍາກາດຟົດຟື້ນ ແລະ ມີຄວາມສາມັກຄີເປັນເອກະພາບ ທີ່ມີມູນເຊື້ອອັນດີງາມຂອງພັກ, ຮັບປະກັນລັກສະນະສືບທອດ, ຕໍ່ເນື່ອງຂອງພັກ. ຜູ້ແທນກອງປະຊຸມໄດ້ຮັບຟັງຄໍາເຫັນໂອລົມຂອງສະຫາຍ ປະທານກອງປະຊຸມ ເຊິ່ງຄໍາເຫັນຊີ້ນໍາຂອງສະຫາຍໄດ້ເປັນເຂັມຊີ້ທິດເຍືອງທາງໃນການຈັດຕັ້ງປະຕິບັດ ມະຕິກອງປະຊຸມໃຫຍ່ສະມາຊິພັກ ຄັ້ງທີ IV ຂອງໜ່ວຍພັກຂະແໜງລ້ຽງສັດ ແລະ ການປະມົງ ໃຫ້ປະກົດຜົນເປັນຈິງ ແລະ ມີປະສິດທິພາບສູງ.